تحدثت الفنانة أمينة خليل عن حبها للفن، قائلة: «أنا مدخلتش الشغلانة دي علشان عايزة شهرة، أنا حقيقي دخلتها عشان بحبها، أنا بني آدمة حالمة وطموحة جدا وعاشقة للفن من وأنا صغيرة، وأنا محظوظة من وأنا صغيرة لأن عائلتي دعموني».
وروت أمينة، خلال استضافتها في برنامج «The W» على «يوتيوب»، موقفا شعرت أنها تعرضت فيه للظلم، قائلة: «من 3 سنين جالي ديسك في ضهري وكنت بعمل أشعة وكنت ماشية متألمة جدا، واحدة قابلتني وحاولت إني ابتسم مع أن والدي ووالدتي مسنداني، وبعد أسبوع لاقيت صورتي نازلة ومكتوب إني تنكة وبتشتم، أنا عيطت وحسيت إني صعبت علي نفسي واتظلمت، وبعدها الناس دافعت عني ونزلوا صورهم معايا اليوم ده»، وأوضحت أنها لا تشعر أنها تحمل رسالة، قائلة: «مش حاسة إني حاليا أقدر أقول إن عندي رسالة، أنا مين علشان أقول رسالة، ويمكن لو عندي حاجة أقولها هقول إن الناس تسمع صوتها هي».
وعن مفهوم الحب بالنسبة إليها، قالت خليل: «مفهوم الحب اتغير عندي وبقى أعمق، وكنت فاكرة إني عايزة حد شبهي وشبه تفكيري، وبعدين اكتشفت أن شريك حياتك ممكن يبقى عكسك، أنا شخصية عفوية ولكن مش همجية، وقابلت الشخص اللي حاسة إنه شبهي والعلاقة ممشيتش خالص، فقلت إني عايزة حد أساسياته شبهي بس شخصيته مختلفة، وأحمد جوزي راكز وقليل الكلام وتقيل، وأنا وصلت لمعادلة لما أدخل في قصة حب مديش قلبي كله».
وتابعت: «أنا بحب الحب، ومش لازم يكون حب لراجل، ممكن يكون لعيالك وأهلك وشغلك، وعمري ما حسيت بجنون العظمة، وأنا ضد مبدأ إن الفنان يتحط في قالب معين ويتعامل بطريقة معينة، وبتعمد إني أقول رأيي، والناس بتستسهل إنها تحكم على بعض، وده شيء بيعصبني جدا، ليه بنحكم على بعض؟».