سؤال يذبح: لو سألنا 10 كويتيين «تحب الكويت؟» 10 بيقولون «أموت فيها».
طيب لو سألناهم: شنو سويت لها اليوم؟ معظمهم بيسكت.
وين المشكلة؟
علمونا من صغار إن الوطن غالي. بس ما علمونا شلون نثبت هالغلا.
صار حب الوطن عندنا = علم بيوم العيد + صورة سناب + أغنية وطنية بالسيارة.
ونسينا ان الرسول ﷺ بكى وهو يودع مكة، وقال: «ما أطيبك من بلد... ولولا قومك ما طلعت». كان يحبها لأنه عاش لها وتعب عشانها.
احنا نحب الكويت؟ زين.
حبك يبين يوم تشوف موظف يرمي ورقة بالأرض وتقوله «عيب».
حبك يبين يوم عيالك يكسرون لعبة بالمدرسة وتدفع من جيبك وتصلحها وتقول لهم: «هذي ملك الكل».
حبك يبين يوم تزرع فسيلة جدام بيتك بالحر، وتسقيها، عشان بعد 10 سنين عيالك يتفيؤون بظلها.
الوطن مو بس بترول ورواتب. الوطن شارع نظيف، طالب شاطر، مهندس يبني، طبيب يعالج. كل واحد فينا سفير للكويت بسلوكه.
«شنو الحل العملي؟»
1. في البيت: الأم والأبو هم أول وزارة. علم عيالك إن «الممتلكات العامة» يعني «ملكي وملكك». اللي يكسر كرسي بالمجمع كأنه كسر كرسي بيته.
2. في الشغل: أتقن شغلك كأنك تبني بيتك. الطبيب اللي يعالج بضمير، المعلم اللي يشرح من قلبه، هذيلا يحبون الكويت أكثر من ألف قصيدة.
3. في الشارع: شفت غلط؟ لا تصور وتنشر. انصح. شفت زبالة؟ شيلها. يد وحدة ما تصفق، بس 10 أيدي تبني وطن.
«الزبدة»: الكويت ما تبي دموع وقت الأزمات. الكويت تبي عرق كل يوم.
ما تبي شعر بس وقت 25 فبراير. تبي أفعال 365 يوم.
يا كويتي، لا تخلي حبك لها مجرد كلام حلو. خله فعل يخلي عيالك بعد 30 سنة يقولون: «أبوي علمني شلون أحب ديرتي».
الله يحفظ الكويت، ويحفظ عيالها البارين فيها.
[email protected]