القاهرة - محمد صلاح
رفضت الفنانة شيرين عبدالوهاب الدخول في الصراع على لقب «صوت مصر»، مؤكدة أن لقبها المفضل هو اسمها، والمهم ما تقدمه من فن ومحتوى، وقالت: «أنا مش بحب الألقاب خالص، أكيد كلنا نحب اسمنا يبقى جنب اسم بلدنا لكن انا لقبي هو اسمي، ومتشغلوش بالكم بمين الأول ومين تاني، وشغلي وفني هو اللي بيشغلني أكتر من الحاجات دي بكتير».
وكشفت شيرين، خلال حوار مباشر مع جمهورها عبر تطبيق «تيك توك»، عن سبب طرحها أغنيات ألبومها الجديد عبر مواقع التواصل الاجتماعي، ملمحة إلى وجود مؤامرة استهدفت منعها من العودة إلى الغناء، وقالت إنها كانت في تحد لطرح هذا الألبوم، وأردفت: «أنا لما حسيت إن الدنيا بتسود خالص وإن فيه اتفاقية كبيرة إني مانزلش أغاني عملت التحدي ده، وكان نيتي إن ربنا يساعدني، وربنا كرمني كرم أكتر من اللي أنا أستاهله بيكم وأنتم ساعدتوني جدا، وكفيتوا ووفيتوا».
وعن اسم ألبومها الجديد، قالت شيرين إنها لم تختار له اسم، وطلبت من متابعيها ان يختاروه معها، فطرح عليها الكثيرون العديد من الأسماء منها «البوتجاز» في إشارة إلى تصريحها بأنها «ستطرح أغانيها حتى لو على البوتاجاز»، وردت عليهم: «معنديش أي مانع اسمي الألبوم البوتاجاز، مش إحنا اخترعنا البوتاجاز؟ خلاص نسميه البوتاجاز».